მედიაში გავრცელებული ინფორმაციის თანახმად, "რეალის" ფრანგმა ფორვარდმა კარიმ ბენზემამ რვაწლიანი მადრიდული მოღვაწეობის შემდეგ შესაძლოა, კლუბი დატოვოს.

ჩინელი ინვესტორების "მილანში" მოსვლის შემდეგ დიდი ალბათობით, იტალიური გრანდი სატრანსფერო ბაზარზე მოწინავე პოზიციას დაიკავებს. ამასთან, უკვე ვრცელდება ინფორმაცია, რომ აზიელები 130 მილიონს მხოლოდ ტრანსფერებისთვის გამოყოფენ.

როგორც იტალიური გამოცემა, "Сalciomercato.it" იტყობინება, "როსონერები" ფრანგი ფორვარდის შეძენას ზაფხულის სატრანსფერო ფანჯრის დროს შეეცდებიან.

გარდა კარიმ ბენზემასადმი ინტერესისა, იტალიელები "დორტმუნდის" თავდამსხმელით, ობამეიანგით და "არსენალის" ფორვარდებით, ალექსის სანჩეზითა და ლუკას პერესით არიან დაინტერესებულნი.

ცნობისთვის, მიმდინარე სეზონში ბენზემამ 27 მატჩი ჩაატარა, სადაც 11 გოლი გაიტანა და 3 საგოლე გადაცემა ჩაიწერა აქტივში.