სამუ კასტილეხო იანვარში "მილანს" არ დატოვებს, თუმცა ზაფხულში მისი ტრანსფერი თითქმის გარდაუვალია, რადგან ესპანელ გარემარბს აღმოაჩნდა ფიზიკური და ტაქტიკური ზღვარი, რომლის გადალახვასაც დიდი ხანია ვერ ახერხებს.

მიუხედავად ამისა, "როსონერის" შვიდიანი მსურველი კლუბების ნაკლებობას არ განიცხდის და გარდა სამშობლოდან ინტერესებისა, არის "რომას" ინტერესიც. "მგლები" უკვე გეგმავენ მომავალ ტრანსფერს და ლომბარდიული გრანდისათვის გაცვლის შეთავაზებასაც ამზადებენ.

"fanpage.it"-ის ინფორმაციით, დედაქალაქელები "მილანისათვის" სამუს სანაცვლოდ ჩენგიზ უნდერის შეთავაზებას აპირებენ, რომელიც ამჟამად "ლესტერშია" განათხოვრებული, თუმცა ნისლიან ალბიონზე თურქი ვინგერის კარიერას წარმატებულს ვერ ვუწოდებთ და თავადაც სერია ა-ში დაბრუნების სურვილი ამოძრავებს.